Nòmber : Julius Oscar “Maracucho”Hellburg
Fecha Nasementu : 9 yüli 1930
Lugá : Maracaibo , Venezuela
Deporte : Sòftbòl/Umpire
Nashonalidat : Ulandes
A drenta salon di fama na 2009
Penshonado di Gobièrnu Sentral Empleado di gobièrnu durante 38 aña. A traha na diferente departamentu di Gobièrnu: Meteorologische Dienst, Postkantoor Curaçao i Centrale Directie der Posterijen, últimamente na Laboratorium voor de Volksgezondheid. Na Laboratorio den funshon di Administrateur.
Kasá ku Maria Ursula Hellburg-Maduro. For di e kasamentu aki a nasé 8 yu, 5 muhé i 3 hòmber, miéntras Julio tin otro 4 yu, 3 muhé i 1 hòmber
Introdukshon, periodo di beisbòl
Julio, na edat relativamente hóben a yega Kòrsou, ora su famia na aña 1936 a disidí bin biba na Kòrsou. Nan a bai biba den Otrobanda, den Rifwaterstraat. Den bario di Rif, pronto e hóben Julio a haña oportunidat pa sera konosí ku tur e hopi deportenan ku nan tabata práktika riba e terenonan di deporte na Rif. Henter siman despues di skol Julio tabata kore tras di tur sorto di bala riba Rif. Ku no ta bala di futbòl, tabata bala di beisbòl, òf bala di sòfbòl, òf bala di cricket, òf bala di tènis. E korementu tras di bala aki, kisas a pone e fundeshi pa e karera deportivo impreshonante ku Julio tabata destiná pa hunga den deporte di Kòrsou, di Antia Ulandes i internashonal. Kisas tabata koinsidensia òf suerte, ku Julio den su hubentut tabatin e oportunidat úniko di topa ku dirigentenan i deportistanan famoso i sobresaliente den nos deporte, manera frater Andreas di Sithoc, Don Nicho Hurtado, Sr. Juan Pablo Vivas, Sr. Bèto Adriana i Sr. Ergilio Hato, tur di felis memoria, Sr Sixto Vos-Rofina, Sr. Marcel Betrian, Sr. José Alfonso, tur ku di un òf otro manera a kontribuí den formashon di e briante karera di Julio “Maracucho” Hellburg.
Julio su bida deportivo aktivo a kuminsá mas ku 70 aña pasa, ora Sr. Juan Pablo Vivas, q.e.p.d., ku tabata biba banda di kas di famia Hellburg den Rifwaterstraat, i ku tabata hungadó di B.B.C. La Fama, tur djadumingu tabata bai wega di beisbòl den Dein òf Heintje Kool ku e hobensitu Julio, ku asina a bira “bat boy” di La Fama. Na skol, promé St. Vincentiusschool, Julio a kuminsá praktiká futbòl aktivamente den DOSKO, i despues e Ia pasa pa St. Thomas College, unda e konosido frater Andreas a tum’é bou di su tutela. Den Sithoc Julio a sigui ku futbòl i tambe a kuminsá ta praktiká beisbòl i sòfbòl. Banda di e deportenan ei, Julio tabata aktivo den tur deporte; ku nan tabata práktika riba Rif: Den Bargesbad: landamentu, basketbòl, tènis, riba vèltnan di deporte: atletismo, futbòl, beisbòl, sòfbòl, cricket, kòrfbal, gemnastik. Kisas ku práktika di e hopi deportenan aki, Julio konsiente òf inkonsientemente a buta e base pa un karera deportivo ku a hib’é na mas ku 20 pais diferente. Di Kòrsou pa Karibe, pa Sur Amérika, pa Sentro Amérika, pa Nort Amérika, pa Europa, pa Asia.
Julio a sa di establesé su mes den beisbòl na Kòrsou i den Antia komo un primera base di inigualabel kalidat defensivo, ku a dun’é nòmbernan manera “e artista de primera base” i “plastic man”. Asina impreshonante, asina espektakular, asina fuera di klase e wega defensivo di Julio tabata, ku e historiadónan deportivo, pa duna rekonosimentu i mérito na esaki, a haña nan obligá di trese un diferenshashon den e funshon na primera base. Asina e kronistanan deportivo ta papia di Julio Hellburg, komo e mihó primera base defensivo di tur tempu.
Periodo den sòfbòl i arbitrahe, 1944 en adelante
Pa straño ku por ta, apesar di tur e hazañanan di Julio den beisbòl, tòg ta su trabou i konosementu profundo di arbitrahe di sòfbòl ku a duna Julio fama i rekonosementu paden i pafó di Kòrsou i Antia. Un karera ku a kuminsá mas ku 70 aña pasá i durante kua, mas ku 40 aña e tabata den direkshon di arbitrahe di sòfbòl na Kòrsou, miéntras e tin aktualmente kasi 20 aña na kabes di arbitrahe den Amérika Latino i Karibe. Mas ku 60 aña di su bida aktivo Julio a dediká na sòfbòl i arbitrahe. 60 Aña, un bida humano ta pasa nos dilanti. Bida di un hòmber simpel i humilde, pero ku sin embargo ta resaltá pa e hopi trabou konsiensudo ku e la hasi inkansabel i desinteresá pa desaroyo di arbitrahe i anotashon di sòfbòl, i ku ademas ta imponé rèspèt pa su konosementu profundo di reglanan di sòfbòl i téknika di arbitrahe. Un hende ta atkirí e konosementu aki solamente, si e ta disponé di e talento pa uni ophetividat ku un filosofia alegre di bida.
No tin sufisiente palabra pa deskribí e briante karera di Julio den arbitrahe di sòfbòl. E karera el ta íntimamente ligá ku desaroyo i floresementu di nos sòfbòl i arbitrahe. Hopi di e hendenan ku tabatin e suerte di traha hopi serka di Julio, ta konsiente di e forsa grandi pero trankilo ku semper tabata sali for di e gran pionero aki. Julio semper tabata e dirigente, ku internamente tabata ser guia pa un kurason ku ta yen di sentimentu, pero ku sin embargo eksternamente tabata dominá e arte di kombiná kabes i kurason den un punto di bista ku tabata ophetivo, sin ku esaki e tabata ofendé e sensibilidat humano.
Julio banda di su konosementu profundo di regla di sòftbòl, téknika di arbitrahe i kapasidat grandi komo ùmpayer, ta poseé tambe e don di fantasia. Tabata hustamente e fantasia aki ku a permití Julio introdusí un sistema nobo den arbitrahe, dunando e persona di ùmpayer i e trabou di Umpayer un dimenshon nobo, un lugá propio den arbitrahe i wega moderno di sòfbòl, ku su estilo masha personal, pekuliar i bistoso di indiká straik i ponche. Julio Hellburg, a hiba su estilo rònt mundu; Area di Karibe, Sur Amérika, Amérika Sentral, Nort Amérika i Europa. Den mas ku 20 pais Julio a sa di imponé su estilo yamativo i alegre di arbitrahe, ganando rekonosimentu i fama na unda ku e Ia aktua. Den tur pais e fanatikada di sòfbòl tabata aploudí su estilo, i tur hende, ku a mir‘é traha komo ùmpayer, ki ora ku nan top’é tabata imitá su estilo di indiká straik den siñal di aprobashon i saludo.
Ta poko ùmpayer den historia largu di mas ku 100 aña di sòfbòl a bira asina popular serka fanátiko, hungadó i dirigente pa su aktuashon, miéntras ningun por presumí tantu nòmber di kariño ku e fanátikonan a dun’é, manera Julio tin. Ata algun di nan:
Bonaire : Do-re-mi
Colombia : Arbitro escalera
Pto Rico : Electric boogey
Merka : : The Riser
Venezuela : El Molino
Ulanda : Scheidsrechter met een vleugel
Scheidsrechter met een robot arm
Promé salida di Julio pa eksterior komo Umpayer
Lo tuma demasiado tempu pa duna un enumerashon di e hopi méritonan digno di menshon di Julio Hellburg. Sin embargo, lo ta bon pa para ketu un ratu na algun di e hopi éksitonan ku Julio a logra den arbitrahe di sòfbòl. Tabata na 1968 ku Julio ta keda nombrá pa señor Clovis Lodewijks, Presidente di Curaçaose Softball Bond, pa aktua komo Umpayer na un torneo di sòfbòl femenino na St. Thomas, Virgin Island. Na St. Thomas, Julio ta hasi gala di su gran kapasidat den arbitrahe, ganando simpatia i atmirashon di dirigente, fanátiko i hungadó, i no a straña ningun hende ora Julio a keda enkargá ku e wega final entre Kòrsou i St. Thomas V.I..
Julio ta bira asina e promé Umpayer di sòfbòl ku ofisialmente ta biaha pa eksterior pa dirigí wega. No tin duda ku e demostrashon di arbitrahe ku Julio a duna na St. Thomas, a habri e porta di arbitrahe internashonal pa ùmpayernan di Kòrsou. Julio, for di 1965, huntu ku señor Hubert Fleming q.e.p.d., riba inisiativa di señor Clovis Lodewijks, tabata duna lès den regla na ùmpayer di sòfbòl di Kòrsou. Pa hasi dunamentu di lès mas fásil, Julio a tuma riba su mes pa tradusí gran parti di e reglanan di sòfbòl na Papiamentu. Durante hopi aña Julio a sigui ku e famoso klínikanan riba regla den Zeemanshuis na Otrobanda, i despues den Landhuis Hel na Saliña. For di e klínikanan aki a sali hopi di e ùmpayernan internashonal ku kua Kòrsou tabata i ta konta: manera Silvio Leonora+, Willy Willems, Marcelino Barry+, Virgilio Poulina+, Gilbert Poulina, Oswin Ortela, Kenneth Bosk, Franklin Hermanus i Emaldo Henson.
Tambe e sekso femenino a haña preparashon den e klínikanan aki, for di kua a sali e promé dos ùmpayer femenino den historia di sòfbòl di Kòrsou, ku ta: sra. Donata Fullinck i sra. Grada Gosepa, i tambe e promé skordónan femenino manera: Donata, Grada, Uki, Sylvia, Sylvania, Jenny, Meredith, Diana i otronan.
Fundashon di un Asosiashon di Umpayer i Skordó
Den añanan setenta, Julio a mira e nesesidat pa organisá tur ùmpayer i skordó di sòfbòl den un asosiashon i huntu ku Willy Willems i Oswin Ortela e Ia lamta un asosiashon di Umpayer i skordó, bou di e nòmber di: “Umpire and Scorer Assosiation of Softball,(U.S.A.S.)”, miéntras e Ia bira su promé presidente. E interesnan di prinsipalmente e ùmpayernan tabata i ta ainda asina dividí, ku te awe Julio no por a logra e union ku tantu e ta anhelá den arbitrahe.
Promé kurso na Kòrsou pa formashon dl ùmpayer dl sòfbòl
Julio no a laga ningun di e hopi problemanan ku tin den deporte i arbitrahe di sòfbòl desanim’é i na 1984, riba inisiativa di Sr. Celfnied Homoet (q.e.p.d.), presidente di Asosiashon di Sòfbòl di Kòrsou i ku koperashon di Federashon di Deporte di Kòrsou a kuminsá ku e promé kurso rekonosé na Kòrsou pa formashon di Umpayer di sòfbòl. Mester tabata un momento di orguyo i satisfakshon profundo pa Julio, ora nba 27 di òktober 1984 den Zeilclub Asiento, e Ia entregá 13 ùmpayer diplomá na C.S.B. i dfto. sr. Homoet, ekspresando e deseo, ku e ùmpayernan diplomá aki, lo forma e base pa e infrastruktura di sòfbòl, ku Sr. Celfried Homoet+ tabatin asina tantu na pechu, i bira e plataforma for di kua arbitrahe di sòfbòl lo por operá den futuro.
Ku mas energia Julio a sigui ta profundisá den reglanan di sòfbòl i mekánika di arbitrahe. Ta manera e tabata sa, ku destino tabatin kosnan grandi prepará p’e den arbitrahe di sòfbòl i ku historia di sòfbòl tabatin su bista pone riba dje.
Promé Yu di Kòrsou/Antiano ku ta bira Umpire-In-Chief di un kampeonato internashonal
Añanan ochenta a bira e dékada di konsagrashon di Julio. Despues di aktuashonnan destaká komo ùmpayer na Venezuela, Puerto Rico i Colombia, señor Clovis Lodewijks den su funshon di Presidente di Konfederashon Panamerikano di Sòfbòl, CONPASA, ta nombra Julio, Umpire-In-Chief di e di II Kampeonato Panamerikano di Sòfbòl femenino na Lima, Perú. Julio ta bira asina e promé Yu di Kòrsou, e promé Antiano pa desempeñá e funshon haltu e importante aki, pero tambe di hopi responsabilidat. Julio a pasa su prueba di kandela ku éksito. Suerte, i no poko tabata esun di Julio, di tin un Yu di Kòrsou den persona di sr. Clovis Lodewijks den un funshon gerensial hopi haltu den sòfbòl mundial, ku sin duda a duna Julio e oportunidat i konfiansa pa subi riba e kaminda di arbitrahe internashonal. Un kaminda difísil i eksigente ku Julio a kana ku determinashon i siguransa, demostrando na tur momento i na tur kaminda su kapasidat di ùmpayer i kalidat di dirigente. Julio no a defroudá e konfiansa ku Sr. Lodewijks a depositá den dje. Ku mas energia i determinashon e Ia kuminsá traha riba un karera den arbitrahe, ku no tin su igual ni paden ni pafó di Kòrsou.
lnstruktor sertifiká pa ISF
Aña 1987 ta hiba Julio Indianapolis, Merka, komo asistente di Sr. Merle Butler den e di X Weganan Deportivo Panamerikano. Julio ta sobresalí den su funshon di árbitro-en-hefe asistente. No a tarda muchu ku Federashon Internashonal di Sòfbòl ta yama Julio pa otro funshon mas importante den arbitrahe di sòfbòl ora e keda nombrá instruktor ofisial pa arbitrahe di Federashon Internashonal di Sòfbòl.
Na novèmber 1987 na Repúblika Dominikano i mart 1988 na Guatemala Julio huntu ku Merle Butler ta dosente na e promé i di dos seminario internashonal pa arbitrahe di sòfbòl. Kisas ta bon pa mi splika un ratu, kiko ta un seminario.
Un seminario ta e kurso di nivel mas haltu di arbitrahe, kaminda ùmpayernan di sòfbòl, despues di pasa un eksamen den regla di wega di sòfbòl i téknika di arbitrahe por haña e titulo di Umpayer diplomá di Federashon Internashonal di Sòfbòl, e titulo mas haltu ku un ùmpayer por optené
Julio ku den pasado den diferente okashon a aktua komo árbitro-en-hefe den kampeonatonan internashonal di sòfbòl, semper den eksterior, na 1988, den e eksitoso kampeonato Sentro Amerikano i di Karibe(CONCACAS), organisá na Kòrsou, ta haña oportunidat pa awor dilanti di e pueblo di Kòrsou, demostrá su gran kapasidat di ùmpayer i dirigente, den funshon di árbitro-en-hefe di e grandioso evento aki.
Coppa Intercontinentale na Bussolengo, ltalia
Den 1989, Julio pa promé be den su largu i eksitoso karera ta bula frontera di nos kontinente i ta biaha pa Bussolengo, Verona, ltalia, pa partisipá komo ùmpayer den “Coppa Intercontinentale”.
Aki un be mas a keda demostrá, e fama di kua Julio ta gosa mundial den arbitrahe, ora den reunion tékniko di e prestigioso torneo aki, e keda nombrá árbitro-en-hefe. Durante dos dia Julio ta duna klínika na e ùmpayernan for di Merka, China, Taiwan, Italia, Oustralia, Ulanda i Puerto Rico, ku mester a partisipá den e torneo aki. Julio tabatin den e torneo aki un aktuashon sobresaliente ku a kondusí na su designashon komo e mihó ùmpayer di Coppa Intercontinentale. Apénas bèk for di Italia, ku ata Julio tin ku biaha pa Hondúras, pa durante un siman largu dirigí e Promé Kurso Internashonal di arbitrahe di sòfbòl na Tegucigalpa. Riba biahe di regreso pa Kòrsou Julio ta pasa Costa Rica unda e ta duna un klínika di dos dia na ùmpayernan di sòfbòl di e pais ei.
Nombramentu komo Intérprete di Regla di Sòfbòl pa Latino Amérika i Karibe
Den desèmber 1989 Julio ta biaha pa Paraná, Argentina, pa dirigí arbitrahe di e di
Ill Kampeonato Panamerikano di Sòfbòl maskulino den funshon di árbitro-en-hefe. Banda di a duna 3 dia di klínika na e Umpayernan ku a intervení den e kampeonato, Julio tabatin tambe ekselente aktuashon komo ùmpayer, dunando kátedra di arbitrahe den e finalísimo partido entre Merka i Canada. Na Argentina Julio ta logra e koronashon di su karera komo Umpayer, ora Presidente di Federashon Internashonal di Sòfbòl, Sr. Don Porter durante kongreso di Konfederashon Panamerikano di Sòfbòl selebrá na Paraná, Argentina, nombra Julio Intérprete di Regla i árbitro-en-hefe Regional di Federashon Internashonal di Sòfbòl pa área di Amérika Latino i Karibe. E funshon mas haltu den arbitrahe mundial despues di esun di e Direktor di Umpayer e Intérprete di Regla di FIS, Sr. Merle Butler.
Mihó Umpayer di sòfbòl di Kòrsou, i 3 biaha siguí “Hues di Aña”.
Ounke nan sa bisa, ku ningun hende ta profeta den su mes pais, tòg, deporte di Kòrsou no a keda sin rindi homenahe na Julio Oscar Hellburg pa su dedikashon kontinuo na, i logronan grandi den arbitrahe paden i pafó di Kòrsou. For di 1985 te 1989, durante 5 aña siguí, Asosiashon di Sòfbòl di Kòrsou ta nombra Julio komo e mihó ùmpayer di sòfbòl di aña, miéntras na 1987, 1988 i 1989, durante tres aña konsekutivo Julio a keda distinguí pa Curaçaose Sport Federatie ku premiashon di “HUES Dl AÑA”. E logro di Julio aki, no tin paralelo den arbitrahe di sòfbòl na Kòrsou.
Kondekorashon “RIDDER IN DE ORDE VAN ORANJE NASSAU”
Na 1988 Riba Aña di La Reina, ta komplasé Su Mahestat Reina Beatrix kondekorá Julio Oscar Hellburg “RIDDER IN DE ORDE VAN ORANJE NASSAU” pa e hopi i bon trabou ku Julio a desplegá pa su pais den su funshon di empleado públiko.
Distinguí ku C.SF. AWARD. Umpayer na Kampeonato Mundial di Sòfbòl
Na 1990, Julio ta biaha pa Aruba i Bonaire pa duna klínika na ùmpayernan di sòfbòl. Na aprel 1990 Julio ta keda distinguí ku e “C.S.F. Award” pa su dedikashon durante mas ku 25 aña komo dirigente deportivo. Na yüni, Julio ta logra un di su aspirashonnan mas grandi ora e keda nombrá komo Umpayer na e di VII Kampeonato Mundial di Sòfbòl femenino na Normal, Illinois, Merka. Aki Julio ta imponé su estilo bistoso i alegre di ùmpayá i ta bira un atrakshon na kampeonato mundial. Na ougùstùs Julio ta kuminsá na Kòrsou ku e di Ill Kurso pa Formashon di Umpayer di Sòfbòl bou di ouspisio di SEDREKO.
lnstruktor di Umpayer na Habana. Cuba – Proposishon pa kambio di reglanan di sòfbòl
Despues di un aña di relativo poko aktividat internashonal, 1991 ta bira un gran aña pa Julio. Den luna di mei, Julio ta haña e enkargo honroso pa biaha pa Cuba, e pais mas avansá den deporte den nos region, pa na Habana dirigí un klínika di arbitrahe di sòfbòl pa prepará e ùmpayernan kubano pa e weganan Panamerikano ku lo keda selebrá na Cuba. Na yüli 1991, Julio ta partisipá komo miembro di Komishon di Reglanan di wega, na e di XV Kongreso di Federashon Internashonal di Sòfbòl ku ta keda organisá na Kòrsou. Pa e Kongreso aki, Julio pa intermediashon di Federashon Antiano di Sòfbòl ta entregá 32 proposishon pa kambio di regla, di kua 19 ta keda aprobá.
Prome Umpire-In-Chief no-Merikano di Weganan Deportivo Panamerikano
Durante e di XI Weganan Deportivo Panamerikano selebrá na Habana, Cuba, Julio ta buta un eslabón importante mas na su briante karera, ora e keda nombrá árbitro-en-hefe di e weganan Panamerikano. Den e historia largu di Weganan Deportivo Panamerikano, semper ta un ùmpayer Merikano bon kalifiká i di hopi eksperensia ku tabata haña nombramentu komo árbitro-en-hefe. Julio pa su kapasidat di arbitrahe, eksperensia i pa su konosementu di regla i mekánika di arbitrahe ta kibra e tradishon aki, ora e bira e promé ùmpayer ku no ta Merikano, ku ta haña e honor di risibí nombramentu komo “Ümpire-In-Chief” di Weganan Deportivo Panamerikano di Cuba.
Korekshon di reglanan na Spañó i diferente klínika di arbitrahe
Den kuminsamentu di sèptèmber, Julio ta haña e enkargo di Federashon Internashonal di Sòfbòl pa korekshon di e redakshon di e reglanan nobo di sòfbòl tantu den e vershon Ingles komo Spañó. Despues di kumpli ku e enkargo aki, Julio un be mas ta biaha pa eksterior, pa Medellin, Colombia, kaminda durante un siman largu e ta duna lès den regla di sòfbòl i mekánika di arbitrahe na ùmpayernan di Sur Amérika.
Durante 1992, Julio ta dediká tempu den organisashon di klínika pa duna splikashon na e Umpayernan lokal riba e hopi kambionan den e reglanan nobo di sòfbòl i algun kambio den mekánika di arbitrahe. Na òktober Julio ta bai Guatemala pa dirigí e di Ill seminario pa arbitrahe di sòfbòl.
Seminario Valencia i Kongreso na Taiwan
1993 ta bira un aña di hopi aktividat pa Julio. Den luna di mart e tin ku biaha pa Valencia, Venezuela, pa dirigí e di IV seminario pa arbitrahe di sòfbòl. Na mei 1993, Julio ta asistí na e di XVI Kongreso di Federashon Internashonal di Sòfbòl na Taiwan komo miembro di Komishon di reglanan di wega. Na e Kongreso aki tambe Julio ta hasi 6 proposishon pa kambio di regla di wega, di kua 3 ta keda aprobá.
Julio na Ulanda i retiro for di arbitrahe internashonal aktivo
Den luna di yüni, Julio ta bal Quito, Ecuador, pa duna un klínika riba arbitrahe i tambe instrukshon riba téknika di pichamentu den sòfbòl. Julio no a kaba di yega drechi for di Ecuador, ku até na yüli, rumbo pa Haarlem, Ulanda, kaminda e ta partisipá komo ùmpayer den “Intercontinental Cup Haarlemse Softbal Week”. Julio ta impreshoná ku su estilo di indiká straik, i mesora nan ta dun’é e nòmber “scheidsrechter met een robot arm”.
Na Ulanda tabata momento di hopi alegria pa Julio, ora hopi mama i tata promé i despues di wega tabata trese nan yu pa fula e man drechi di Julio, p’asina kombensé nan ku no tabata trata di un “robot arm”. Pero tambe tabata momento di tristesa, ora Julio, den un seremonia emoshonal ku su koleganan ùmpayer ulandes, italiano i merikano a organisá p’e, a disidí di buta un punto tras di su briante karera di Umpayer internashonal aktivo.
Korekshon di reglanan di sòfbòl, i diferente biahanan pa eksterior
Pa motibu di e hopi diskrepansianan ku tabatin den e reglanan di wega den e vershon Ingles i Spañó, den ougùstùs, Julio ta risibí e enkargo di Federashon Internashonal di Sòfbòl, pa traha un tradukshon nobo di e vershon na Spañó ku ta kompletamente den liña ku e vershon na Ingles. Julio ta kumpli ku e enkargo aki na satisfakshon di Federashon Internashonal di Sòfbòl. Apénas, Julio a kaba ku e enkargo aki, ku até na kareda ku maleta pa bai Mexico. Na Mexico e ta dirigí e di V seminario pa arbitrahe di sòfbòl i despues ta drenta den su otro funshon di árbitro-en-hefe di e di IV Kampeonato Panamerikano di sòftbòl maskulino. Na novèmber, Julio ta biaha pa Puerto Rico pa dirigí e di VI seminario pa arbitrahe di sòfbòl i despues ta sirbi di delegado di selekshon femenino di sòfbòl antiano na di XII Weganan Sentro Amerikano i di Karibe.
Aña 1994 ‘n kuminsá drechi, ku den yanüari, Julio ta biaha pa eI Salvador, pa duna un klínika na Umpayernan di Amérika Sentral i pa dirigí arbitrahe di sòfbòl di e di V Weganan Sentro Amerikano den funshon di árbitro-en-hefe. Na yüni, Julio ta bai Bahia Blanca, na Argentina pa dirigí e di VII Seminario pa arbitrahe di sòfbòl i asina kuminsá prepará e ùmpayernan di Sur Amérika pa e Weganan Panamerikano di 1995 na Argentina. Julio a kuminsá 1994 ku biahamentu i ta sera aña ku biahamentu ora den desèmber e biaha pa Guatemala pa un be mas den funshon di árbitro-en-hefe dirigí arbitrahe di e di Ill kampeonato Panamerikano di sòftbòl femenino.
Proposishon pa kambionan di regla di sòfbòl i UIC na XII Weganan Deportivo Panamerikano
Estudio kontinuo di reglanan di wega di sòfbòl tin komo resultado ku Julio hopi be ta haña un òf otro motibu pa trese kambio den reglanan di sòfbòl. Pa e di XVII Kongreso di Federashon Internashonal di Sòfbòl ku a keda organisá den yüli 1995 na Puerto Rico, Julio a entrega 11 proposishon pa kambio di regla, di kua 7 a keda aprobá.
Na 1995 Julio ta biaha pa Paraná, Argentina, pa un be mas den funshon di árbitro-en-hefe dirigí arbitrahe di sòfbòl den e di XII Weganan Deportivo Panamerikano. Despues di regresá for di Argentina, Julio ta kuminsá ku e di Ill Kurso pa Formashon di Umpayer di Sòfbòl, bou di ouspisio di Gobièrnu di Kòrsou, SEDREKO. Den 1996, Sr. Matos, Presidente di Arubaanse Softball Bond ta manda buska Julio pa duna lès na e ùmpayernan ku mester partisipá den Kampeonato di Sòfbòl di Aruba. Durante 5 dia largu Julio ta duna klínika den regla i téknika di arbitrahe.
Sòfbòl Slo Pich i fundashon di FUSSOKO
Durante añanan 1996 pa 1999, Julio ta konsentrá su atenshon riba sòfbòl hubenil i sòfbòl eskolar. Banda di esei e ta duna oido na un apelashon ku Liganan di sòfbòl Slo Pich ta hasi na su persona pa yuda den e diferente komishonnan di e liganan i tambe pa duna konseho riba reglanan di wega, i reglamento di kampeonato.
Julio ta aktivo komo Árbitro-en-hefe i tambe Umpayer di Liga 40, Liga Tra’i Seru i Liga Van Engelen, i despues tambe Liga Uni Tur. Pa por trese un standarisashon den maneho di arbitrahe den Slo Pich, Julio ta funda un federashon di Umpayer i skordó di Slo Pich, bou di nòmber di: “FEDERASHON DI UMPAYER I SKORDO Dl SOFBOL SLO PICH Dl KORSOU, “FUSSOKO”, i ta bira su promé presidente.
Tradukshon reglanan ofisial di sòfbòl den Papiamentu
E hopi difikultatnan ku Julio a eksperensiá den su trayektoria den deporte di sòfbòl na Antia Ulandes i Aruba den konosementu i komprendimentu di reglanan di sòfbòl serka gran parti di deportista, tékniko i ùmpayer, na 1997 a índusí Julio pa tradusí na Papiamentu e Reglanan Ofisial di Sòfbòl di Federashon Internashonal di Sòfbòl. E tradukshon no tabata fásil, i despues di un trabou inmenso na 1998 e buki di regla na Papiamentu a keda publiká ekstraofisialmente. Na kuminsamentu di aña 2000 e buki di regla aki den nos lenga vernákulo a keda publiká ofisialmente. Julio a bisa semper, ku e buki di regla na Papiamentu lo ta e korona di mas balor riba su karera deportivo. Nos ta kere firmemente ku Julio ku e buki di Reglanan Ofisial di Sòfbòl na Papiamentu, a krea un monumento pa su mes den kua e ta inmortalisá su mes pa deporte di sòfbòl.
Orador na Simposio
Pa su konosementu profundo di historia i desaroyo di sòfbòl na Kòrsou, Julio ta haña un invitashon di S.B.C. Sigui Gosa, klup di kua e ta kofundador, pa ta orador na un simposio den kua e mester a elaborá riba e tópiko “SOFBOL SLO PICH, UN DEPORTE PAROTIN ?.
Julio den su manera karakterístiko a duna un eksposishon ekselente, i a mustra riba e transishon di sòfbòl Slo Pich na Kòrsou, di un deporte rekreativo pa un deporte kompetitivo i a base di sifra a mustra riba kresementu kuantitativo i kualitativo di Slo Pich.
Sekretario General di CONPASA
Den mes aña 1999, sr. Clovis Lodewijks, Presidente di CONPASA ta nombra Julio Sekretario General di e importante Confederaciôn Panamericana de Softbol. Den e funshon aki Julio ta biaha pa Winnipeg, Canada pa asistí na e di XIII Weganan Deportivo Panamerikano.
Aki Julio ta keda nombrá sekretario den e importante Komishon Tékniko, ku tin ku dirigí e weganan di sòfbòl di e weganan aki. Bèk for di Winnipeg, Canada, Julio ta bolbe keda elegí, den Direktiva di Curaçaose Softball Bond, i un biaha mas e ta pasa pa okupá e importante puesto di sekretario
Vershon nobo buki di regla na Spañó
Pa e konosementu ku Julio tin di reglanan di sòfbòl i pa su dominio di e.o. Spañó e Ingles, Julio ta kumpli ku un mandato hopi pisá di Federashon Internashonal di Sòfbòl pa koregí i revisá e Reglanan Ofisial di Sòfbòl den su vershon na Spañó pa aña 2000, i pa trese esaki den liña ku e vershon na Ingles.
Miembro di Salon di Fama di I.S.F.
Na 2001, Julio durante Kongreso di Federashon Internashonal di Sòfbòl na Tampa, Florida, U.S.A. unánimamente ta keda elihí pa drenta Salon di Fama di I.S.F. . Un aña despues na Kòrsou, durante seremonia di selebrashon di Hubileo di Oro di Asosiashon di Sòfbòl di Kòrsou, Julio ta keda introdusí pa Presidente i Sekretario General di Federashon Internashonal di Sòfbòl den Salon di Fama di I.S.F..
Den añanan 2000 Julio ta kontinuá ku su biahanan pa eksterior pa kumpli den su funshon tékniko, sea pa sirbi komo Umpire-In-Chief di Kampeonatonan Panamerikano; pa dirigí Seminarionan di Arbitrahe na Repúblika Dominikano, Puerto Rico, Colombia i Guatemala, òf sea den su funshon atministrativo Julio ta sirbi komo sekretario di Komishon Tékniko na Kampeonatonan Panamerikano na Santo Domingo, Rep. Dominikana; Maracay, Venezuela; Guatemala i Rio de Janeiro, Brasil.
Na 2007 Presidente Porter di ISF ta nombra Julio komo mediador di ISF pa solushoná un konflikto den organisashon di sòfbòl na Aruba. Den e funshon aki Julio tabatin ku biaha na diferente okashon pa Aruba, i ku satisfakshon por bisa ku tin progreso den e mediashon.
2008 ta marka pa Julio dos akontesimentu importante, ora den di X Kongreso di Konfederashon Panamerikano di Sòfbòl e keda elihí unánimamente komo Promé Vise Presidente di e Konfederashon aki, ku ta esun di mas grandi i prestigioso di Kontinente Merikano.
Algun luna despues Julio ta keda nombrá komo Miembro di Komishon Tékniko pa Weganan Olímpiko na Beijing China, i na ougùstùs 2008 Julio ta biaha pa China pa kumpli ku e trabou importante den Komishon Tékniko di Sòfbòl.
Periodo largu komo dirigente atministrativo
For di edat hóben Julio tabata enbolbí den trabou atministrativo di deporte. Julio fuera di tabata hungadó di B.B.C. Lucky Strike, tabata tambe sekretario di e klup aki. Mas despues Julio a bira sekretario tambe di su klup di futbòl di bario S.V. Riverside. Aki Julio a buta un base pa hasi karera komo un sekretario vitalisio den kasi tur organisashon deportivo i no deportivo di kua e tabata miembro.
For di 1948 te ku 2008, durante kasi 60 aña siguí, Julio tabata Sekretario na Kòrsou di diferente klup repartí e.o. den e siguiente organisashonnan: B.B.C. Lucky Strike; S.V. Riverside; S.B.C. Caballeros; S.B.C. Sigui Gosa; A.B.V.O.;Asosiashon di Sòfbòl di Kòrsou; Federashon di Sòfbòl di Antia Ulandes; Federashon di Deporte di Kòrsou, miéntras internashonal for di 1998 te ku 2008, kasi 10 aña, Julio tabata Sekretario General di Konfederashon Panamerikano di Sòfbòl. Na 2008 Julio a keda elihí Promé Vise Presidente di CONPASA i asina a yega un fin na e karera largu i eksitoso di Julio Sekretario. Na diferente okashon Julio tabata delegado prinsipal di selekshon femenino di Sòfbòl di Antia Ulandes na kampeonatonan regional di sòfbòl..
English version
Julio, at a relatively young age, arrived in Curaçao when his family decided to move there in the year 1936. They settled in Otrobanda, in Rifwaterstraat. In the Rif neighborhood, young Julio found the opportunity to get acquainted with various sports disciplines practiced on the sports fields in Rif. Throughout the week after school, Julio would run behind all kinds of balls in Rif. Whether it was a soccer ball, baseball, softball, cricket, or tennis ball, he chased after them, laying the foundation for the impressive sports career that Julio was destined to have in Curaçao, the Netherlands Antilles, and internationally. Perhaps it was coincidence or luck that Julio, in his youth, had the unique opportunity to meet famous sports leaders and athletes who played a crucial role in the development of his remarkable sports career. Figures such as Brother Andreas from Sithoc, Don Nicho Hurtado, Mr. Juan Pablo Vivas, Mr. Bèto Adriana, and Mr. Ergilio Hato, all of fond memory, as well as Mr. Sixto Vos-Rofina, Mr. Marcel Betrian, and Mr. José Alfonso, all contributed in one way or another to shaping the brilliant career of Julio “Maracucho” Hellburg. Julio established himself in baseball in Curaçao and the Netherlands Antilles as an unparalleled defensive first baseman, earning nicknames like “the artist of first base” and “plastic man.” After playing in Aruba, he also earned the title of “Mister First Baseman.” For over 10 years, Julio was part of the Curaçao baseball selection and held the position of first baseman. During this period, Julio successfully played against teams from Aruba, Venezuela, Colombia, the Dominican Republic, and Puerto Rico. His defensive play was so impressive, spectacular, and exceptional that it led to a differentiation in the first-base position in recognition of his contributions.
A serious leg injury at a relatively young age forced Julio to abandon baseball. After a few years of tranquility, Julio began playing softball in S.B.C. Caballero. As a pitcher for S.B.C. Caballero in the unofficial championship in 1966, he became the Softball Pitcher Champion, a feat he repeated in the official Softball Championship of the Curaçao Softball Association in 1967. Julio played softball in Aruba, Venezuela, Colombia, and the Dominican Republic. In Caracas, Venezuela, in 1969, playing against the Caracas selection in the “Brígito Irriarte Stadium,” Julio pitched for 14 innings to win the game 3-2. At that time, it was the longest softball game played in Venezuela. Julio also represented the Curaçao softball selection.
In the period of softball and umpiring from 1944 onwards, surprisingly, despite all his achievements in baseball, it was Julio’s deep knowledge and dedication to softball umpiring that earned him fame and recognition within and beyond Curaçao and the Netherlands Antilles. A career that began over 60 years ago and during which, for over 40 years, he directed softball umpiring in Curaçao, and for nearly 20 years, he has been at the helm of umpiring in Latin America and the Caribbean. Julio dedicated more than 60 years of his active life to softball and umpiring. Sixty years is a lifetime, and Julio led a simple and humble life, yet one that stands out for the conscientious and selfless work he tirelessly did for the development of softball umpiring and scoring, as well as for his profound knowledge of softball rules and umpiring techniques. Only those possessing the talent to unite dedication with a joyful life philosophy can acquire such knowledge.
There are not enough words to describe Julio’s brilliant career in softball umpiring. His career is intimately linked to the development and flourishing of softball and umpiring. Many of those fortunate enough to work closely with Julio are aware of the great yet calm strength that always emanated from this grand pioneer. Julio was always a leader, internally guiding with a heart full of sentiment but externally mastering the art of combining intellect and heart in a viewpoint that was effective without offending human sensibility.
Beyond his profound knowledge of softball rules, umpiring techniques, and his excellent abilities as an umpire, Julio possessed the gift of imagination. It was precisely this imagination that allowed Julio to introduce a new system in umpiring, giving the umpire and the job of umpiring a new dimension, a unique place in modern softball umpiring and play. With his very personal, peculiar, and entertaining style of calling strikes and outs, Julio took his distinctive umpiring style around the world, from the Caribbean, South America, Central America, North America to Europe. In more than 20 countries, Julio impressed with his vibrant and cheerful umpiring style, gaining recognition and fame wherever he performed. In every country, softball fans applauded his style, and everyone who saw him work as an umpire would imitate his way of signaling strikes as a sign of approval and salute.
Few umpires in the long history of over 100 years of softball have become as popular among fans, players, and officials for their performance as Julio has. Some of the endearing nicknames he received include:
Bonaire: Do-re-mi
Colombia: Arbitro escalera
Puerto Rico: Electric boogey
USA: The Riser
Venezuela: El Molino
Netherlands: Scheidsrechter met een vleugel, Scheidsrechter met een robot arm
The 1980s marked the decade of Julio’s consecration. After remarkable performances as an umpire in Venezuela, Puerto Rico, and Colombia, Mr. Clovis Lodewijks, in his role as President of the Pan American Softball Confederation, CONPASA, appointed Julio as the Umpire-In-Chief for the II Pan American Women’s Softball Championship in Lima, Peru. Julio became the first Curaçaoan and the first person from the Netherlands Antilles to hold this prestigious position.
Despite the saying that no one is a prophet in their own country, Curaçao’s sports community has not failed to honor Julio Oscar Hellburg for his continuous dedication and significant achievements in umpiring both at home and abroad. From 1985 to 1989, for five consecutive years, the Curaçao Softball Association named Julio the best softball umpire of the year, while in 1987, 1988, and 1989, for three consecutive years, Julio was distinguished by the Curaçao Sport Federation with the “HUES Dl AÑA” award. Julio’s achievement in this regard has no equivalent in Curaçao’s softball umpiring history.
In 1988, on Queen’s Day, Her Majesty Queen Beatrix decorated Julio Oscar Hellburg as a “RIDDER IN DE ORDE VAN ORANJE NASSAU” for his outstanding work for his country in his public service role.
In April 1990, Julio was honored with the “C.S.F. Award” for his dedication during more than 25 years as a sports administrator. In June, Julio achieved one of his greatest aspirations when he was appointed as an Umpire at the VII Women’s Softball World Championship in Normal, Illinois, USA.