![Johnny Hellmund Ricardo Elhage](https://fdok.cw/wp-content/uploads/2024/04/Johnny-Hellmund-2016-250x300.png)
Johnny Hellmund (Biyar)
Deportista
a nasé dia 13 di febrüari 1946 na Korsou
Johnny Hellmund, konosí den e mundu di biyar di Antia i Aruba komo “The Legend”, a siña hunga biyar na edat di 7 pa 8 aña riba e mesa di biyar (karambola) i na edat di 15 pa 16 aña e a kuminsá hunga biyar (pool), kaminda mester hinka mas tantu bola posibel den e seis burakunan di e mesa, ganando ya kaba di hopi bon tiradó adulto den e bario di Pietermaai.
Na 1964 Johnny a bai studia na Hulanda na e siudat Groningen i durante su estudio a sali kampeon di karambola di e District “Het Noorden” (Groningen, Drente, Friesland) na vários okashon den e diferente disiplinanan di karambola, manera “Libre, Tres-banda, Kader 38-2 i Un- banda” den e periodo di 1967 pa 1973.
Na ougùstùs 1973 Johnny ta regresá Korsou despues di terminá su estudio pa hurista i mesora ta risibí invitashon di e presidente di “Curacaose Biljart Bond” di e tempu ey, Sr. Sansio Schob q.e.p.d., kende tabata na altura di Johnny su éksitonan na Hulanda, pa partisipá den e diferente torneonan i kampeonatonan di karambola. Mayoria di e weganan a tuma lugá na e klupnan di JPF i Asiento.
Johnny a gana praktikamente tur evento di karambola ku a wòrdu organisá den e periodo di 1973 pa 1985. Despues di 1985 e popularidat di karambola a kai hopi mes i ta e disiplina di pool (pocket-billiards) a bira sumamente popular, tantu na Korsou, Aruba, Boneiru i St. Maarten.
Den e periodo di 1985 pa 2013 Johnny a dominá e deporte di pool na Antia Hulandes den e diferente disiplinanan, manera bola-8, bola-9, bola-10 i straight-pool, akumulando mas di 70 título individual sin konta esnan ku e a gana ku su ekipo “The Biesheuvel Friends”den e weganan di ekipo.
Johnny ta e promé yu di Korsou ku a partisipá den un kampeonato mundial di biyar. Esaki tabata na 1993 na Alemania i despues e a partisipá na 1994 na Chicago, na 1995 na Taiwan/Japon, na 1996 na Suesia i finalmente na 1998 un biaha mas na Taiwan. Despues Johnny a representá Korsou for di 2000 te ku 2013 kasi tur aña den e respektivo kampeonatonan Panamericano, entre otro na Venezuela (2x), Colombia (2x), Aruba (2x), Guatemala, Korsou, Panama, i por ultimo na Boneiru na 2013 kaminda e Presidente di e Federashon Panamericano a sorprendé Johnny na momento di e klousura i entrega di premio ku un homenage speshal pa e despedida di Johnny su partisipashon aktivo komo hungadó na e kampeonatonan aki. Na dos okashon Johnny a terminá na di 9 lugá for di un total di 64 partisipante den e diferente kampeonatonan Panamericano.
Johnny a wòrdu nominá vários bes pa deportista di aña di Korsou i a gana e título aki di deportista maskulino di aña na 2002.
Fuera di e kampeonatonan Mundial i Panamericano ofisial Johnny a representá Korsou na hopi otro torneonan internashonal ku a tuma lugá na diferente okashon na tantu Puerto Rico, Santo Domingo, Venezuela, Guadeloupe, Aruba i Boneiru.
Apart for di biyar Johnny tabata aktivamente envolví tambe ku basta éksito den baseball komo coach i interim-manager di BBC Wildcats den añanan setenta/ochenta i Johnny a traha tambe den diferente komishon pa tantu e deportenan di baseball i futbol.
English version
Johnny Hellmund, also known as “The Legend,” began playing billiards in Antia and Aruba at the age of 7 or 8 on a carom table. By the age of 15 or 16, he transitioned to playing pool, where the objective is to sink as many balls as possible into the six pockets of the table. He quickly gained a reputation as a skilled player, defeating many experienced adult players in the Pietermaai neighborhood.
In 1964, Johnny went to study in the Netherlands in the city of Groningen. During his studies, he became the champion of carom billiards in the “Het Noorden” District (Groningen, Drente, Friesland) in various disciplines such as “Libre, Tres-banda, Kader 38-2, and One-band” from 1967 to 1973.
In August 1973, Johnny returned to Curaçao after completing his studies to become a lawyer. He received an invitation from the then-president of the “Curacaose Biljart Bond,” Mr. Sansio Schob (may he rest in peace), who was aware of Johnny’s successes in the Netherlands. Johnny participated in various billiards tournaments and championships, with most events taking place at JPF and Asiento clubs.
From 1973 to 1985, Johnny practically won every carom billiards event organized. After 1985, the popularity of carom billiards declined, and pool (pocket-billiards) became extremely popular in Curaçao, Aruba, Bonaire, and St. Maarten.
From 1985 to 2013, Johnny dominated the sport of pool in the Dutch Caribbean in various disciplines such as 8-ball, 9-ball, 10-ball, and straight pool, accumulating more than 70 individual titles, not counting those he won with his team “The Biesheuvel Friends” in team events.
Johnny was the first Curaçaoan to participate in a world billiards championship, starting in 1993 in Germany. He continued to represent Curaçao in subsequent years in championships in Chicago (1994), Taiwan/Japan (1995), Sweden (1996), and Taiwan again in 1998. From 2000 to 2013, Johnny participated annually in the respective Pan-American championships, held in countries such as Venezuela (2x), Colombia (2x), Aruba (2x), Guatemala, Curaçao, Panama, and finally in Bonaire in 2013. On two occasions, Johnny finished in 9th place out of a total of 64 participants in various Pan-American championships.
Johnny was nominated several times for Curaçao’s Athlete of the Year and won the title of Male Athlete of the Year in 2002.
Outside of official World and Pan-American championships, Johnny represented Curaçao in many other international tournaments held in Puerto Rico, Santo Domingo, Venezuela, Guadeloupe, Aruba, and Bonaire.
In addition to billiards, Johnny was actively involved in baseball as a coach and interim manager for the BBC Wildcats in the 1970s and 1980s. He also worked in various commissions for both baseball and soccer sports.