Feria Inter Curacao 2024 Road to mundial!
Dia 1 i 2 di yüni 2024, Aspafiko ta organisá su feria anual. Esaki ta e momentu krusial promé ku tur e atletanan sali pa representá Kòrsou na e Kampionato Mundial benidero. Aspafiko ta hasi un yamada na komunidat pa asistí na e feria aki, kontribuyendo asina na mundu di pasofino aki na Kòrsou.
E feria no solamente ta un estímulo pa e atletanan lokal, sino tambe un oportunidat pa mustrá e kultura i dedikashon di e isla pa e deporte úniko aki. Ta un festividat di pashon i talento ku tin den komunidat di pasofino. Dor di e feria aki, por mustrá e apoyo inkondishonal na e atletanan ku ta luchando pa pone e nòmber di Kòrsou mas haltu riba mapa internashonal.
E presensia i partisipashon di komunidat den e evento aki ta vital. Ta un oportunidat pa uni i sostené nos atletanan. Huntu nos por hasi e feria aki un éksito total i manda nos atletanan na e Kampionato Mundial ku tur e apoyo i energia positivo di nan pueblo.
Asosashon Pasofino Kòrsou ta warda boso.
