NARGELIS STATIA INVITA PA TIM DI RELEVO ULANDES

WILLEMSTAD.- E atleta lokal Nargelis Statia siman pasá a kore ku bon resultado na Ulanda, despues di a risibí invitashon pa djòin e tim di relevo femenino hubenil ku ta train pa Kampeonato Oropeo den luna di yüli benidero na Suesia.

Nargelis Statia ta atleta di e tim Trupial, pero tin Sigfried Regales (Olympic) komo su trainer personal.

Pa e hóben atleta e invitashon tabata algu grandi, ya ku e ta bira e promé dama yu di Kòrsou selektá pa un tim di relevo di Ulanda.

Dia 23 di mei el a biaha pa Ulanda pa seshonnan di training komo tambe algun kareda pa por a kumpli ku eksigensha di Atletiek Unie pa kareda individual den e kampeonato na Suesia.

Djasabra último Nargelis a kore na Bèlgika, drechando su tempu i alabes a pone 2 rekòrt pa Kòrsou.

Riba distansha di 100m. el a marka tempu di 12:03 sekònde, pa kibra rekòrt nashonal ku ta riba su mes nòmber. Na mart último el a marka tempu di 12:07 sekònde.

Seguidamente el a kompetí riba 200m. i a marka un tremendo tempu di 24:29 sekònde, kibrando e rekòrt nashonal di 24:39 ku ta data di 1990.

Ademas dje rekòrt pa Kòrsou, Nargelis a keda kuater sentésimo di sekònde bou dje eksigensha.

Nargelis Statia apénas tres aña pasá a gana medaya den CARIFTA na Bermuda miéntras ku tambe el a keda premiá komo Deportista di Aña 2012. Su meta ta pa yega Kampeonato Oropeo i tambe klasifiká pa Weganan Olímpiko.