Centro di Barber kampion den FFK su Liga MCB 2014

WILLEMSTAD – E tim di Centro Barber a gana di Centro Dominguitu 1-0, riba djadumingu dia 7 desèmber 2014, pa asina bira kampion di e kampionato di e promé divishon di futbòl FFK, Liga MCB 2014.

E wega aki a hunga den SDK i tabata e gran final ku a konta tambe di un públiko grandi kua gosa di e wega, unda e atardi tambe a keda animá pa Gio.

A habri e atardi, ku un wega hubenil, sigui pa un ratu di alabansa, pa despues Tico Libiee kanta nos himno nashonal. A sigui ku algun diskurso, pa despues rèfri Mike van de Sande flùit pa bala por a lora.

Ruensly Leuteria a anotá e úniko gol di wega, na di 38 minüt di promé mitar, riba un pase di Kenny Kunst.

Kenny Kunst di Centro Barber, nèt promé ku e pitaso pa sosiegu i Dhenico Pauletta di Centro Dominguitu, algu promé ku e pitaso final, tabata e dos hungadónan ku a risibí karchi kòrá, huntu ku e diferente otro karchi helnan ku Mike van de Sande mester a saka pa asina mantené su wega kontrolá.

Despues di wega dirigentenan di FFK, huntu ku minister Asjes, a hasi entrega di premionan na e timnan kampion i supkampion, ku ta Centro Barber, dirigí pa Nooi Girigorie i Centro Dominguitu dirigí pa Ingi Pieternella.