Julio Rooi

Na edat di 14 aña Julio a kuminsá hunga bala den e ekipo ku yama Argentina Junior.

Ku 16 aña Julio a militá den Hilversum i ku su 17 aña Julio a bira miembro di “Curacaose Voetbal Bond”, komo miembro di e klup “Volharding” ku tabata hunga den A- klasse.

Na mesun edat di 17 aña Julio a kuminsá práktika deportenan di Atletismo i Bòkseo den Villa Maria i alabes e tabata hunga beisbòl den Deportivo Venezuela.

Na aña 1938 Julio a efektuá su promé pelea den peso pisa ku 184 liber i a pèrdè pa téknika nòkout den di 4 asalto di mi kontrinkante ku tabata pisa 234 liber.

Dos luna despues den su pelea di revancha, Julio a gana di mes un forma den di 3 asalto.

Tur Julio se demas peleanan tabata eksibishon komo ta Julio ku Chababa so tabatin den e peso aki na Kòrsou.

Riba tereno di futbòl Julio a sigui desaroyá su talentonan i den aña 1940 i 1941 Julio a partisipá den selekshon di “Curacaose Voetbal Bond”.

Entretantu su aktuashon den atletismo tabata hopi eksitoso, tabatin un temporada ku Julio tabata karga 5 rekòrt: “Kogel”, Disko, Sper, Salto alto i “Vijfkamp”.

Na aña 1944 Julio a forma parti di un delegashon ku a biaha pa Caracas i tuma parti den algun evenementu di atletismo. Aya Julio a kibra dos di su rekòrt ku tabata “kogel” i salto alto.

Aña 1946 Julio a biaha pa Hulanda pa partisipá den e kampeonato Hulandes di atletismo.

Promé ku e kampeonato mes tuma lugá Julio a partisipá na diferente torneonan di fogeo na diferente suidat manera; Den Haag, Dordrecht, Rotterdam, Leiden, i Hoorn.

Den e toreneonan di fogeo Julio a logra hopi éksito pero den e weganan ofisial si kos a kambia un poko ya komo aki Julio mester a enfrentá e mehor atletanan di Hulanda.

Na 1946 Julio a partisipá na e Weganan Sentro Amerikano i di Karibe ku a tuma lugá na Baranquilla, Colombia, na unda Julio a logra un di 6 puesto riba sper.

Na final di su eksitoso karera komo atleta den e ramonan di atletismo, beisbòl, futbòl, bòkseo Julio a kuminsá traha tambe komo dirigente tantu tékniko, atministrativo i komo umpire den beisbòl i rèfri i den bòkseo profeshonal.

Julio a biaha na vários okashon komo dirigente ku diferente selekshon i a bishita diferente pais den nos region.

Na final di su karera komo dirigente den beisbòl Julio a fungi komo manager di Santa Rosa Indians i manager di e selekshon di beisbòl di Kòrsou.

Aktualmente Julio ta partisipando den e deporte di dominó den e federashon di Kòrsou komo un di e mehornan, tantu riba nivel nashonal komo internashonal.

Julio ta presidente di e klup di dominó Los Veterano presidente di e federashon Antiano di dominó i miembro di direktiva di e federashon internashonal di dominó.

Esaki pues ta un historia deportivo di sr. Julio Rooi ku ta wòrdu konsiderá un di nos mehor atleta “all-a-round” ku Kòrsou a produsí.