Atleta di aña 2018
Atleta di aña 2018

Guillaume "Sam Bunting" Hamson

Sam na edat di 6 aña a muda for di Rep. Dominikana pa Aruba i na 1950 Sam a bini Kòrsou pa traha pa CPIM ku despues a bira SHELL.
Su karera deportivo a kuminsá na Aruba na edat di 14 aña tempu ku el a kuminsá bati bala pa algun dama di B.G. ku tabata hunga sòftbòl di rekreashon.
Kasi mesun tempu algun amigu na Aruba, Ruben Phillips, Big Jim i Ramon huntu ku Sam a lanta un tim di baseball Baly-Ruth di kual e tabata manager, Baly -Ruth a gana tur wega i kampeonato di nan tèmpo.

Na 1950 Sam a bini Kòrsou.
Mesora el a buska kontakto ku klupnan lokal i a djòin Unídos, un tim di Penstraat kaminda el a bai biba.

Manager di Unídos tabata Aston Gumbs.
No a tarda muchu ku Sam a wòrdu nombra manager di Unídos.
Unídos no tabata un ekipo fuerte , pero e tabata konosí pa su motivashon.
Sam tabata catcher i 4 bate.
Den Unídos Sam huntu ku Aston Gums a kuminsá ku Unídos Jr. , un klup ku a produsí hopi super estrea.
Di Unídos Sam a kambia pa Bolívar ku despues a bira Amstel pa manager e klup aki.
Di Bolívar Sam a sigui pa Victory ku awe ta Royal Scorpions i tambe for di baseball.

Sam su karera di Sòftbòl a kuminsá mes momentu ku el a yega Kòrsou na 1950.
Huntu ku Aston Gumbs el a kuminsá ku Sòftbòl klup Unídos ku a dura te ku 1957 ora ku Sòftbòl a terminá na Kòrsou pa motibu di pleitu entre un klup i Federashon.
Den e tempu ei Sam su estreanan tabata Rubia Hoek, Altagrasia Gittes, Amelia Riem i Ofelina Gumbs ruman di Aston Gumbs.

Na 1962 Sam a drenta Sòftbòl atrobe ora ku Celfried Homoet a buska su ayudo pa train un tim di sòftbòl di algun hobensita. For di e momentu ei Sam su kas tabata tereno di sòftbòl.

Na 1968 Sam su tim Rising Trotters ta sali sub-kampion i di 1970 te ku 1974 kampeon di Kòrsou. Den mesun tempu nan a sali tambe kampeon di Antia.

Riba tereno di aktividat hubenil Sam, huntu ku Juancho Josefina i Boy Jansen a kuminsá ku un liga Stimulans ku a traha mayoria di e hungadónan di aktualidat.
E liga aki a hunga 15 aña i Sam su klup Rising Trotters a gana e kampeonato aki 10 biaha.
Riba tereno internashonal durante su karera Sam a risibí vários rekonosementu entrenan:

Na 1975 Miembro meritorio di C.S.B.
Na 1976 Kodekor tékniko di aña
Na 1977 Tékniko sobresaliente di C.S.B.
Na 1982 Ere-medaille in goud di La Reina Juliana

Sam durante su karera deportivo a distinguí su mes pa su forma korekto ku e ta trata su hungadónan i direktiva. Sam no ta huma ni bebe!!!!!!!!!!!!!
Na e momento aki Sam ta yuda direktiva den e parti tékniko i organisashon manera , marka vèlt, drecha bar i drecha material. Sam ta un persona masha honesto i leal , i tambe Sam ta miembro di e kuerpo di umpire ku a hasi 25 aña.