Atleta di aña 2018
Atleta di aña 2018

Esther Etlyn Jansen

Esther Etlyn Jansen, (Softbol)

Deportista

mihó konosí komo Jèt, a nasé dia 22 di aprel 1951.

 

 

Na 1963 Sr. Ashton Gumbs Q.e.p.d. a funda sòftbòl klup Cardenales originalmente den bario  di Parera i despues a amplia e klup ku algun damita mas di e barionan di Saliña i Steenrijk.

Esther, su rumannan a dun’é e nòmber di kariño di “Jet”, ta bini di un famia di deportista ,tabatin 4 ruman aktivo riba tereno di deporte tantu den beisbòl komo sòftbòl.

 

Jèt a kuminsá hunga sòftbòl na aña 1965 den S.B.C. Cardenales den kua klup e tabatin un ruman muhé tabata hunga. Sr. Ashton Gumbs, di felis memoria, su esfuersonan , asistí pa su coach sr. Sonny Martina a hasi ku Jèt a haña oportunidat pa desaroyá su talento i kapasidatnan deportivo ku a hiba Jèt na un karera deportivo hopi eksitoso tantu na Kòrsou komo den eksterior.

Jèt a kuminsá hunga posishon di shòrt stòp, despues tersera base, picher, primera base i finalmente Jèt a bira un “all around player” den sòftbòl. Un di e poko hungadónan den sòfbòl di Kòrsou i Antia Ulandes ku por a hunga sòfbòl bon tur posishon. Jèt tabata sobresalí pa su fildeo impagabel, tirunan fuerte i sertero i un bateo temibel. Jèt, ku e sistema agresivo pero alegre ku e tabata hunga sòftbòl a kombèrtí den “spark plug” di S.B.C. Cardenales, i no a tarda muchu ku Jèt  a pasa pa forma parti di selekshon di sòftbòl di Antia Ulandes. Esther “Jet” Jansen tabatin aktuashon sobresaliente i den no ménos ku 2 okashon na 1971 Kamp. CONCACAS na PTO Rico i na 1973 na Kamp. CONCACAS na Valenvia, Venezuela e ta keda proklamá komo MVP di kampeonato, miéntras el a sa tambe den tur dos okashon poderá di titulo di kampeon bate.  Na  1976 na Kampeonato CONCAS na San Salvador tabatin aktuashon destaká ku a yuda Antia Ulandes konkista Medaya di Oro, miéntras Jet un biaha mas a sali kampeon bate i e hungadó ku mas “two base hit” bati. Huntu ku Aida, Esther ta e dos úniko hungadónan di Antia  Ulandes ku  tin riba nan nòmber dos “MVP Award” otorgá pa Confederashon Regional di Softbol, miéntras Esther Jansen den Kompetensia internashonal den no ménos ku 3 okashon a sa di konkista titulo Kampeon Bate

Karera deportivo 1965-1998

 

1965    Afiliashon na sòftbòl klup Cardenales.

1967    Kondekorashon ku medaya di oro komo deportista femenino di aña.

1970    Promé finalista Reina di deporte (representante sòftbòl)

1970    Esther ku ekipo SBC Cardenales ta representá Korsou na St. Thomas Virgin Islands tèrminá na di tres lugá.

1971    Kondekorashon ku medaya di oro deportista femenino di aña pa di dos bes.

1971    Selekshon di Antia ta gana medaya di oro na Puerto Rico den kampeonato C.A.C. Esther ta gana e titulo di hungadó mas destaká di C.A.C.

 

1973    Selekshon di Antia ta gana medaya di plata na Venezuela den di dos kampeonato C.A.C. Esther ta gana e titulo di hungadó mas destaká pa di dos bes i ta Sali tambe kampeon bate.

 

1973    Dirigente di S.B.C. Cardenales ta pone konfiansa den Esther i ta nombr’é kapitan di ekipo.

 

1974    Esther ta forma parti di selekshon di Antia pa e di 12 weganan C.A.C. na Sto. Domingo , Antia ta keda na di tres lugá ganando medaya di bròns.

 

1976    Selekshon di Antia ta gana medaya di oro na El Salvador durante di tres kampeonato C.A.C.

 

1978    Selekshon di Antia ta biaha pa Colombia.

 

1978    Esther ta risibí plaka di mérito pa trabounan inkansa-bel na interes di sòftbòl di C.D.M.

 

1979    Esther ta biaha ku S.B.C. Cardinales pa St. Maarten pa un torneo di Antia Hulandes i ta keda n di dos lugá.

 

1983    Plaka di mérito otorgá dor di SITEK komo miembro dediká na deporte pa mas ku 10 aña.

 

1983    Na 1983, Esther “Jèt” Jansen a base di su eksperensia komo un deportista femenino eksitoso ta haña invitashon pa ta oradó na un simposio di deporte organisá pa SEDREKO i CSF den oula di Universidat di Antia Ulandes den kua “Jèt” tabatin ku elaborá riba e tema: “E hende muhé den Deporte”. Esther “Jèt” Jansen a laga un bon impreshon atras ku su konferensia.

 

1985    Partisipashon na weganan interinsular na Aruba Esther i su ekipo ta titulá sub. kampion.

 

1986    Esther huntu ku su ekipo S.B.C. Cardenales ta titulá kampion di Korsou poniendo un fin na e racha di viktoria di Pichingolo.

 

1987.   Esther huntu ku su ekipo ta titulá sup kampion di Korsou.

 

1988    Na 1988 Esther “Jèt” Jansen ta bira e promé hungadó femenino di sòfbòl ku ta bira mènedjer di un klup di sòfbòl den klase AA. Banda di esei “Jèt” ta demostrá di ta un persona polifasétiko ora e kambia bate i wante pa mikrofon i bira e promé komentarista femenino deportivo na Kòrsou durante e eksitoso kampeonato C.A.C. organisá na Kòrsou..

 

1990    Plaka mérito otorgá dor di bario di Parera komo promé dirigente femenino.

 

1991    Medayista di plata ku e ekipo di Cardenales.

 

1993    Plaka di mérito otorgá dor di SBC Hell Angels pa aporte durante torneo organisá.

 

1995    Na 1995, e biaha aki na Ulanda durante “Haarlemse Honkbal Week”, Esther “Jèt” Jansen ta fungi komo komentarista deportivo na radio.

 

 

1998    Na 1998, Esther “Jèt” Jansen, ta kologá wante, bate i spaik, i ofisialmente ta buta un punto final tras di un karera impreshonante den sòfbòl ku a kuminsá mas ku 30 aña pasá

 

2002    Esther ta risibí plaka konmemorativo na okashon di 50 aña di eksistensha di C.S.B.

 

2014    Esther ta drenta Salon di Fama di CSOF.