Atleta di aña 2018
Atleta di aña 2018

Isaias "Iyo" Pimentel

Iyo ta un tenista yu di Kòrsou ku den añanan 50 pa 60 a optené fama mundial riba kancha di tènis.

Iyo a bira interesá den e deporte aki dor ku diariamente e tabata mira hende práktika e deporte aki riba kanchanan di CSC bieu na Skalo. E mes a traha un raket di palu i ku esaki e tabata hunga, te ku un dia un hende a regal’é su promé raket di bèrdat. Ku 13 aña Iyo a disidí di inskribí su mes den kampionato hubenil, kual el a gana. Na edat di 15 aña Iyo a bira kampion senior di dòbel huntu ku su ruman Ramon. Ku 16 aña Iyo a optené e kampionato maximo di Kòrsou esta kabayero” single”.

Iyo a mantené e titulo aki pa 3 aña konsekutivo. Riba invitashon di Venezuela Iyo a bai hunga un torneo ayanan i el a sabi di gana e kampion Venezolano i a disidí na keda Venezuela. Bou di bandera Venezolano ku edat di 17 aña Iyo a partisipá na weganan Sentro Amérika y del Caribe den kual el a sabi di gana medaya di bròns. Na aña 1953 Iyo a gana e kampionato máksimo di Venezuela kual ta un titulo ku el a mantené 13 aña largu.

Na aña 1961 y 1965 Iyo a partisipá na weganan Bolivariano y a bira kampion den tur e dos evenementonan aki. Bou di bandera Venezolano Iyo a partisipá den hopi torneo internashonal entre kual “Oranje Bowl” den kual el a penetrá te den final di dòbel. Den kampionato Sur-America na 1958 den e partido di final despues di bentaha di dos set Iyo a kibra su rudia i despues di un operashon Iyo mester a keda inaktivo pa 2 aña. Den su karera tenistiko Iyo a partisipá den tur torneo ku ta partisipá na e “Grandslam” manera Oustraliano Open, Wimbledon, “Flushing Meadows y Fench Open” i semper el a wòrdu pone den e”main draw”. Den total Iyo a hunga 8 torneo di wimbledon y na aña 1961 el penetrá te den kuart final y tabatin e honor di hunga riba “Center Court” na Wimbledon loke ta pa mayoria di tenista un soño. Iyo ta konsiderá aña 1961 komo su GRAN aña den tènis.

E aña ei el a pertenesé na e promé 10 hungadónan riba “ranking” mundial. Na aña 1965 e tabata e último aña ku Iyo a partisipá den e “GRANSLAM” i el a bolbe hunga riba center “court” na wimbledon, Su siguiente aña el a hunga su último Davis Cup pa Venezuela, un torneo ku el a hunga 5 biaha total. Iyo su satisfakshon mas grandi riba tereno deportivo ta, di tabatin e honor di hunga riba center “court” na Wimbledon.