Atleta di aña 2018
Atleta di aña 2018

Ergilio Hato

Ergilio Orilio Hato a nase dia 7 di novèmber 1926 na seru di Otrabanda pa ta mas eksakto na Hoogstraat # 2. Ela bai St. Vicentius skol i tabata hunga futbòl den e tim di skol. Despues ela kuminsá hunga bala den Jong Curaçao .
E tabata un tremendo hungadó tantu den gol komo delantero. Na aña 1946 el a pasa pa militá den e klup Jong Holland tim ku ela keda den dje te na final di su karera. Tempu di gloria di Orilio tabata di aña 1943 te ku 1958.
Orilio su ekipo Jong Holland a sali e tempu ei 9 biaha kampion di Kòrsou i 1 biaha kampion di Antia ku Orilio komo portero (kiper). Orilio tabata un tremendo kiper i tabata e kiper di selekshon di Antia i a representá nos pais na e siguiente paisnan: Aruba , Guatemala, 5 biaha, Costa Rica 5 biaha, Mexico Hondúras, Fransia, Hulanda, Alemania, Dinamarka, Noruega, Helsinky, Finlandia i Venezuela.
Orilio ta konosí komo un di e mihó kipernan di Sentro Latino Amérika.
E tabata bula di un manera inkreibel i a haña e siguiente apodonan:
Pantera Negra, Hombre de Goma ,El hombre plástiko, El Falcon Orilio huntu ku Sr. Pedro Matrona tabata e promé antianonan ku a reforsá selekshon di Hulanda. .Esei tabata na aña 1950.
E aña di mas grandi den su karera tabata na aña 1946 ora ku Curacaose Voetbal Bond a hasi 25 aña i a organisá un torneo internashonal ku partisipashon di Aruba, Kòrsou , Sürnam, Colombia, I Feyenoord di Hulanda. Kòrsou a bira kampion ganando Feyenoord 4 pa 0 ku Orilio den gol. Kòrsou
a gana e torneo ku solamente un gol kontra. Akinan Orilio a sali e mihó hungadó di e torneo.
Orilio a hunga tambe pa e ekipo di Literal na Venezuela. Orilio no tabata konosí komo kiper so pero tambe komo un tremendo delantero. Na aña 1953 Orilio a hunga rechtsbuiten pa selekshon di Antia na Guatemala.
Orilio a sali e mihó rechtsbuiten di e torneo, hinkando 6 gol den dos wega i a sali e hungadó mas disiplina. Esaki tabata un torneo di Sentro Amérika i del Caribe.
Desepshon grandi: Orilio ta konosí tambe komo un di e mihó tiradónan di penalty pero na Helsinky ela faya. Ela tira e pinalti afó i Antia a pèrdè ku Turkia 2 pa 1 i Antia no a klasifiká pa final.
Den e temporada ku Orilio tabata hunga bala Kòrsou tabata konosé hopi bon hungadónan di bala manera Enchi Jansen, Eddy Vlinder, Claudio Hato, Pedro Matrona, Remigio Donker, Ga Bernadina, Ronald Delanooi , Piet Conquet, Fefe Delanooi, Edmundo Confesor, Loi Mersera, Willy Heyliger, Mario Jansen, Wihem Canword, Edgar Meulens, Morty Meulens, Iziqueil Vos, Chebu Pinedo, Frank Poulina, Papa Klabeer , Cayootji Gosilio Gein Giribaldi.
Esei ta djis pa menshoná un par.


Orilio a hunga 5 biaha na Costa Rica i tabata masha famá mes ayanan. Na su honor tin un parke na Costa Rica ku su nòmber Parque Ergilio Hato .
Galardonnan: Ergilio Hato a haña dos biaha e kondekorashon komo Ridde in de orde van Oranje Nassau. Ela wòrdu nombra diferente biaha komo hungadó di aña. Ela presentá hopi biaha den e programa deportivo di Shell na enkargo di Don Hecto Rosario.

Parke Ergilio Hato

Na aña 1997 a nombra nos stadion di Futbòl SDK na su nòmber ku awe nos konosé komo stadion Ergilio Hato. Pero e galardon òf e premio di mas grandi pa Orilio a optené ta e apresio ku e tin serka e pueblo di Kòrsou. No tin nada mas importante ku ser apresiá komo hende pa loke bo ta i no pa loke bo tin.

Banda di ta konosí komo un bon deportista Orilio ta konosí tambe komo todo un kabayero, desente i ku rèspèt pa tur hende. Ergilio ta kerí pa pueblo di Kòrsou i ta gosa de rèspèt di un i tur pasombra e ta duna rèspèt. Un persona humilde yen di kalor humano.