Wilfred "Willie" Pietersz

Mr. Baseball DOUBLE YOU

Hungadó di Baseball Aktivo den Añanan 1961 - 
Miembro di Royal Scorpions B.B.C.

 Logronan riba tereno, ta masha importante pa kualkier deportista.
Ta nan ta pone e espektador haña atenshon pa su persona i asina ta konvertié den un ídolo.
Pero igualmente ta di importansia, ku e logronan riba tereno di wega, ta kompaña pa ehèmpelnan di dedikashon, disiplina i kompañerismo.
E introdukshon kòrtiku ku nos a kaba di presentá, ta pa siguí e presentashon di WILLIE PIETERSZ, hungadó di beisbòl, miembro aktivo ROYAL SCORPIONS BASEBALL CLUB na momentu di  su morto trágiko dia 2 di febrüari 1978.

Mas òf ménos 16 aña WILLIE  PIETERSZ a militá aktivamente den klase superior di beisbòl i keda klasifiká den grupo di hungadó, ku a destaká, sea den kampeonato regular òf torneo lokal, interinsular òf internashonal.
Aunke e rekuerdo di su hazañanan ta bibu ainda den memoria i mayoria di esnan presente aki, nos ta haña ku ta nesesario menshoná algun di su logronan, a fin di duna konstansia di eseinan i asina hustifiká ku datonan, e motibu ku a skohé pa forma parti di nos SALON DI FAMA . Sí t’asina ku e datonan ku nos ta duna no ta kompleto, pe loke nos por suministrá, ya ta basta pa nos meta.
Na aña 1965, Willy Pietersz q. e. p. d. ta sali kampion bate di e torneo Beproma. E ta logra e distinshon aki, esta kampion bate di e kampeonato tambe na añanan 1967, 1968, 1969 i pa último bia na 1977.
 E ta sali komo kampeon di homerun na añanan 1970, 1974.
Na aña 1968 e ta haña e distinshon di “Most Valuable Player” na aña 1972 mihó deportista di aña,.
Di un aña, esta 1967, nos tin e datonan, ku e la logra e tripel korona, esta ku e tabata kampeon bate, mas hit konektá i mas kareda empuhá, ademas e tabatin mas homerun, doblete tripel i kareda anotá.
Den e turneonan interinsular tambe Willie Pietersz a destaká asina nos por menshoná ku e la forma parti dje tim ganadó di Firestone ku den dékada di 60 ta kohe e promé título di kampeon Antiano di Beisbòl.
Pa loke Willie Pietersz a logra riba terenonan internashonal nos tin di menshoná na promé lugá ku na aña 1970, durante e weganan Panamerikano, a Panamá, ku Antia pèrdiendo tur nan 8 weganan , e ta sali kampeon bate ku un averahe di 560 punto, entre e 162 partisipantenan. Na 1967 e ta haña e distinkshon di mihó hungadó dje torneo tené na Hulanda, pa na aña 1972 e resultá e hungadó ku mas homerun konektá dje torneo ku ta tuma lugá e aña ei.
Na aña 1976, na okashon ku “Curaçaose Baseball Associatie” ta selebrá su 40 aña di exitensia, ku un torneo internashonal, e organisashon máximo ta dediká e torneo aki na Willie Pietersz , komo rekonosementu pa su aporte n’e deporte.
Apesar di tabata i ta loke prensa a denomin’é un supestar Willie Pietersz a duna prueba di su dedikashon na su deporte stimá dor di sea, train klupnan, aktua komo umpire pa klasenan ménos den kategoria ku e ta partisipá aden i en general hasi tur loke ta na su alkanse, pa propaganda su deporte stimá.
Mester pone aserka su kondukta ehemplar riba tereno i tambe pafó di esei, kaminda semper bai e ta un kompañero apresiá di su miembronan di ekipo òf di e selekshon, ku ta forma parti di dje.
Su entusiasmo pe wega kompaña pa un sentido di humor, ta insitá esnan ku ta rondon’é, pa tende lo mehor riba tereno.
Willie a debutá den AA na 1960 ku Viceroy (Royal Scorpions). Na 1965, Willie tabata importante den konkista di e promé titulo antiano di e ekipo funda dor di Wilfrido Valeriaan (g.e.p.d.), Royal Scorpions. Kampeon bateado ku un averahe haltisimo di 560 na Weganan Sentro Amerikano i Karibe, Panamá 1970. Ganadó di tripel korona na aña 1971 i kampeon bate Kòrsou 1977. Ta djis tres di e puntonan haltu di Willie ku tabata wòrdu yama Mr Baseball entre otro. Nòmber ku ainda i na su honor ta wòrdu karga pa su ekipo. E tabata wòrdu respetá pa tantu su kompañero i kontrinkantenan. No solamente komo pelotero pero komo persona tambe. Semper stima serka e fanatikada, pa su simplesa. Un bon picher i un tremendo bateado. Palabra ta poko pa deskribí su grandesa. Wilfrido Valeriaan den e buki “Un pida historia di nos beisbòl” skirbi pa Orlando Nicolina a konta ku den e aña komo debutante di e aktual ekipo Royal Scorpions den AA, Willie no a mira akshon. “Ta te e siguiente aña el a bini for di e ekipo di Carpatula. E tabata flaku, flaku. Delegá mes. Willie a drenta komo ‘pinch-hitter’ i konektá di homerun kontra Antonio ‘Chikitin Gregorius”. Riba e pregunta dikon komo ‘pinch-hitter’ e fundadó di Royal Scorpions a kontesta: “Tabatin yen hungadó mihó ku n’e. El a kaba di subi i mester a proba su mes”. Segun e poko dokumentashon konfiabel ku nos ta disponé, Willie su último homerun a wòrdu konektá dia 7 yüli 1977, 7-7-77. Durante di e aña el a bati komo kinto bate den e promé ‘All Star Game’ ofisial di beisbòl nivel AA organisá na Kòrsou. Otro dia memorabel ta dia 1 yüni 1975 ora ku Henry Jones, Rafi Josefa i Willei Pietersz a konektá homerunnan back to back to back. Nelson “Kabouter” Guttieres tabatin Willie Pietersz komo su ídolo e ta kòrda ku tempu ku e tabata enfrente, nunka e no tabatin miedu di dje. “Semper mi kier a mustr’é ku ami si ta domin’é. E promé biaha ku mi a enfrente tabata na 1970, e no a hasimi muchu kos. Algun aña despues di esei sí mi ta kòrda kla ku el a dal mi algun homerun”. Orlando Cuales komo un di esnan ku a hasi beisbòl popular ku narashon na papiamentu tambe ta korda momentunan grandi di Mr Baseball: “Ami no por lubidá e famoso ‘back to backnan’ di Willie ku Rafi, momentunan pa historia. Mi tabata buska den nos kasètnan di pasado, algu pa hinka den un programa pa ilustrá e inmenso kapasidat di Royal Scorpions. E poder brutu. E inmenso kapasidat i poderio scorpioen. Den forma aplastante kon nan tabata aplastá nan rival. A puro palo. E narashon tabata bai di akuerdo ku e kos ei tambe”. Na momentu di papia di e ‘top ten’ den historia di beisbòl tin algun nòmber ku semper ta resoná manera: Wili Pieters, Juan Isa, Orlando Cuales, Rafi Josefa, Hubert Flemming, Renato Anasagasti, Aco Henriques i Antonio Keller. E dos nan sobrá kada biaha ta varia pero e promé seis te  shetenan ta aparesé serka  míles di konosedó, siguidó i fanátiko. “Lonte”  Balentin ku nunka no ta laga espasio pa duda ora e ta opiná semper a bisa: “Willie tabata kompletu, bon bateado mes i ora e dal un roling no ta fásil pa bo para e roling ei. Ta un kañon. No mester tin ningun diskushon e ta e mihó di tur tempu. Kampeon bate na weganan regional, no ta algu fásil”.
Otro buki ku informashon i dokumentashon konfiabel ta “Homrun” skirbí pa Hubert Flemming (d.f.m) e maestro di estadistika Flemming ta indiká numbernan ku Pietersz a pone durante loke despues a resultá su último temporada den nos beisbòl. Den 20 wega 30 hit den 78 turno ofisial pa average 385, 6 bataso di kuater skina, 8 doblete, 22 kareda anotá, 22 kareda empuhá, komo si fuera poko el a gana 4 wega komo pícher.
Esaki en korto, ta loke nos por a trese dilanti awe na momentu ku nos designá WILLIE PIETERSZ. komo miembro di nos SALA DI FAMA di deporte C. S. F.