Romoldo Martis

Na aña 1960 Romoldo Martis na edat di 15 aña a kuminsá práktika e ramo di deporte di sòftbòl ku su amigunan.Na 1991 e ta bira kofundador di e klup di sòftbòl Sta. Rosa White Sox/Presto Light@ Na 1962 e klup ta partisipá pa promé biaha na kampionato ofisial di sòftbòl. Den su promé aña Romoldo a kuminsá hunga n’e posishon di 2da base y shortstop a despues a bira Apicher@ kual posishon el okupá durante 20 aña largu.

Komo picher el a logra tur su éksitonan tantu riba nivel lokal komo internashonal. Su promé kontakto ku picheo tabata na aña 1966 ku na Venezuela e Gerente General di Banko Metroplolitano, Señor Molina siñ’é algu di picheo na momento ku su ekipo Sta. Rosa White Sox/Cockspur tabata di bishita na e pais aki pa realisá algun wega amistoso. Despues di su regreso na Kòrsou, Romoldo a sigui desaroyá riba su mes y ku boluntat y dedikashon ela bira un di nos mehor pichernan di sòftbòl maskulino ku a haña rekonosimentu tantu lokal komo internashonal.

Durante su karera komo picher, Romoldo a logra hiba su klup na e titulo kampionil, tantu di Kòrsou komo di Antia y na nivel internashonal Romoldo a logra gana 3 medaya : 2 di Oro y 1 di Plata. Na 1978 na Medellin-Colombia, tabata Romoldo su labor ku a pone ku Antia a gana Medaya di Oro den e Weganan Sentro Amerikano y di Karibe. Na 1983 na Cartegena-Colombia, Romoldo a pone ku Antias ta gana Medaya di Plata den Kampionato Panamerikano di Sòftbòl. Na aña 1987 Romoldo ta retirá komo hungadó aktivo y ta bai dediká su tempu na trabou di instruktor di picheo. Den e funshon aki el kompaña diferente selekshon Antiano na kompetensianan Internashonal. Tambe Romoldo a duna klínika di Picheo riba solisitut di e Konfederashon Sentro Amerikano i di Karibe di Sòftbòl na diferente pais, e.o. Repúblika Dominikana, Cuba, Hondúras, Costa Rica y Boneiru.

E satisfakshon di mas grandi pa Romoldo ta ku e ta wòrdu rekonosé komo un Instruktor di Picheo di Sòftbòl di alto nivel. Esaki ta wòrdu manifestá públikamente pa e Ex-Presidente di e Federashon di Sòftbòl di Sto. Domingo, Señor Freddy Vallego despues ku e ekipo maskulino di Sto. Domingo a bira kampion den e Kampionato Sentro Amerikano i di Karibe ku a tuma lugá na 1983 na Cartagena - Colombia.